प्रधानमन्त्री सुशीला कार्की ले वारागुङ मुक्तिक्षेत्र–१ स्थित पवित्र मुक्तिनाथ मन्दिर को दर्शन गर्नुभएको छ।
नेपाली सेनाको हेलिकोप्टरमार्फत मुस्ताङ पुग्नुभएका प्रधानमन्त्री कार्कीले मुक्तिनाथस्थित १०८ धारामा जलसेचन गरी मन्दिरमा पूजाआजा गर्नुभएको हो। दर्शनका क्रममा उहाँलाई वारागुङ मुक्तिक्षेत्र गाउँपालिकाका अध्यक्ष रिनजिन नामगेल गुरुङ, सहायक प्रमुख जिल्ला अधिकारी एकनारायण भण्डारी, मुक्तिनाथ विकास समिति का पदाधिकारी तथा स्थानीय प्रतिनिधिले स्वागत गरेका थिए।
मन्दिर क्षेत्रको अवलोकनका क्रममा पूर्वाधार निर्माणसम्बन्धी योजनाहरू पुरातत्व विभागमा पेस भए पनि स्वीकृतिमा ढिलाइ भइरहेको जानकारी गराइएको थियो। चेन्जिङ रुम, १०८ धारा पुनर्निर्माण, एनएक्स भवन र आनी आवासलगायत आठ योजना अघि बढाउन मौखिक ध्यानाकर्षण गराइएको बताइएको छ। प्रधानमन्त्री कार्कीले आवश्यक प्रक्रिया अघि बढाउने आश्वासन दिनुभएको जनाइएको छ।
निर्वाचन सफल पार्न निर्देशन
मुक्तिनाथ दर्शनपछि प्रधानमन्त्री कार्की जोमसोमस्थित इन्द्रबक्स गण पुग्नुभएको थियो। त्यहाँ आयोजित निर्वाचनलक्षित छलफलमा उहाँले यही फागुन २१ गते हुने प्रतिनिधिसभा सदस्य निर्वाचन स्वच्छ, निष्पक्ष, स्वतन्त्र र भयरहित वातावरणमा सम्पन्न गर्न निर्देशन दिनुभएको छ।
प्रधानमन्त्रीले सुरक्षाकर्मीलाई दत्तचित्त भएर जिम्मेवारी निर्वाह गर्न आग्रह गर्दै कुनै समस्या नआउने गरी तयारी गर्न निर्देशन दिनुभएको प्रमुख जिल्ला अधिकारी अजिता शर्माले जानकारी दिनुभयो। जिल्ला मुख्य निर्वाचन अधिकृत विद्याराज पौडेलले निर्वाचन तयारीबारे जानकारी गराउनुभएको थियो।
